ჯამზე სახელი ამოკაწრულია ბერძნულად, ტიპური ბერძნული დაბოლოებით, მაგრამ თვითონ სახელი ბერძნული არ ჩანს. ეს ბერძნული ასოებით შესრულებული და ბერძნული ფორმით გადმოცემული ადგილობრივი კოლხური სახელი უნდა იყოს. იმავე სამარხში აღმოჩნდა კოლხური წარმოების დოქი ყურზე ბერძნულად ამოკაწრული სახელ მეტოსის თანხმოვნებით (მონოგრამაში ხმოვნების გამოტოვება შეიძლება რეგიონში არამეულის გავლენის შედეგი იყოს). თუ მხედველობაში მივიღებთ ამ მეორე ნიშანდადებულ ჭურჭელს, სავსებით მიზანშეწონილია იმაზე ფიქრი, რომ მეტოსი სამარხში დაკრძალული მიცვალებულის სახელი იყო. შავლაკიანი ჯამი, ისევე, როგორც ამავე სამარხში ჩატანებული დახლოებით ძვ.წ. 470 წელს დამზადებული შავფიგურული სტილის კილიკი, მისი შეძლებულობის დამადასტურებელია. დანარჩენ ინვენტარს შორის იყო ვერცხლის ომფალოსიანი თასი და კიდევ უფრო მნიშვნელოვანი - ვერცხლის დიადემა.